政情：尹兆堅橫額 撕極仲見樣

立法會議員尹兆堅喺葵芳嘅橫額被人(界刂)爛，但佢嘅頭像撕完一張，又有另一張，撕極都有，好似塊無限鏡，最後露出又見到佢大半塊面。佢隔籬嘅社區主任唐皓文仲搞笑，個樣甩咗，但有人幫手黐番上去。點解有呢個奇景呢？唔通佢知道會被人破壞預先黐多幾張？

原來一張疊一張

我哋問過尹兆堅，佢話好多議員平時都懶得拆舊橫額，會直接將新嘅疊上去，久而久之，就有幾幅橫額疊埋一齊。啊！嗰個係佢舊橫額個樣嚟嘅。佢又話之前都有市民幫手黐番佢哋嘅樣上去，覺得都算係一種反宣傳。

佢仲話呢啲情況見怪不怪，因為今次都唔係第一次，之前佢試過黐咗一百張寫住香港人加油嘅橫額，最後被人撕剩二三十張，最絕嘅係直接剪爛索帶，成塊橫額跌落嚟。