政情：質詢港鐵關站受阻攔 方國珊勢咬實陳帆

事緣近排嘅反修例遊行示威，好多時最後都演變成衝突，有幾次警方仲喺港鐵站內發射催淚彈，搞到有啲普通市民都無辜受影響。有唔少市民不滿港鐵做法，仲發起包圍涉事嘅葵芳站同埋太古站，要求港鐵交代。不過，就因為有市民喺車站做出破壞性行為同鬧職員，搞到港鐵決定喺上星期六同日進行公眾活動期間，關閉部分觀塘線同埋荃灣線嘅車站。

促作特別接駁安排

西貢區議會交通運輸委員會尋日開咗個特別會議，講吓將軍澳隧道巴士轉乘站日後嘅服務安排同埋轉乘優惠。而咁啱上星期六港鐵就關閉咗彩虹站至調景嶺站一帶嘅車站，正正牽涉西貢區議會部分範圍，所以哪吒趁機提出臨時動議，譴責運房局縱容港鐵喺冇合理原因同埋安排替代交通工具下停駛，要求佢哋提交清晰、高透明度嘅停駛標準同埋作出特別接駁安排，同埋要求港鐵就上周六、日嘅停駛事件向公眾道歉同埋作出賠償。

斥委員會自我閹割

有關議案最終不獲受理，哪吒就鬧爆，話委員會連嚴重影響民生嘅議案都容納唔到，批評做法係自我閹割。佢仲話嚟緊會再喺大會上提緊急質詢，要求港鐵同運房局正面回應同埋道歉。

作為委員會主席，劉偉章就話因為尋日係特別會議，相關議程同港鐵冇關，所以冇港鐵嘅代表出席，由於冇對口單位，因此唔接受臨時動議。佢仲話如果有需要可以再提出訴求，咁就可以再同對口單位商討。對於被哪吒批評，劉就話唔介意，仲話明白哪吒係要做呢個動作，所以都冇辦法喎。

今次受影響係觀塘線同埋荃灣線，仲要唔止係一個區，如果其他區議會都有樣學樣，睇嚟陳帆都唔知點拆彈喇！