中環出更：葉劉赴美交流 籲勿通過港人權民主法案
六名立法會議員日前應美國國務院邀請，到當地出席「香港——美國立法機關交流團」，期間曾討論美方將推動《香港人權與民主法案》。有份參加交流團嘅立法會議員葉劉淑儀表示，美方嘅法案包括部分制裁香港嘅條款，例如參與推動修訂《逃犯條例》嘅官員不獲發簽證等。佢已向美國議員解釋，港府已完全停止修例工作，認為冇需要推動相關法案，望美方能考慮意見。
隨團嘅紡織及製衣界議員鍾國斌（Felix）亦話，部分推動法案的美國議員從來冇到過香港同中國，完全唔了解中港兩地實際情況，有當地議員亦認同香港嘅事務應由香港自行解決。教育界議員葉建源就話，據佢了解，美國議會對法案有唔同意見，有人認為需待美國總統特朗普表態，亦有人相信法案已走入直路，獲通過機會較大，但就未有實際嘅立法時間表。葉劉又話喺美國交流期間，泛民同建制派議員均對美國議員表達不希望貿易戰影響香港。
過關時被以為係鍾國斌太太
講起今次行程，葉劉就發生咗件趣事，佢話喺德州入境時，海關就以為佢同佢嘅女助理，以及鍾國斌係一家人，以為佢係Felix嘅太太、女助理係兩人嘅囡囡添！由葉太變鍾太，葉劉話當時同鍾國斌都好尷尬，而佢仲即刻澄清番話係同事嚟。
卓妮