中環出更：長跑最緊要享受 梁百行：唔使扯晒蝦
既要着眼於公益，又要兼顧盈利嘅社會企業，經營難度較一般嘅商業機構要高得多。社企「全城街馬」聯合創辦人及行政總裁梁百行，尋日喺一個座談會上就講到以長跑運動為經營項目，賺取盈利固然唔容易，但最艱巨嘅就係要改變大眾對長跑嘅觀念。
本身係長跑愛好者嘅梁百行話，以前長跑畀人嘅印象係非常刻苦，隨時跑到五官扭曲、扯晒蝦，揮汗如雨同腳底起水泡，唔係咁就無法創下個人佳績。佢話要推廣長跑運動，就要大家明白唔係專業運動員，係唔需要介懷自己跑得有幾快，反而享受跑步嘅過程先至最重要。佢話要將長跑運動喺民間普及，就需要將長跑活動設計得輕鬆同活潑，大家跑得開心，就更容易領略到長跑嘅特質同好處。
社企民間高峰會籌備委員會主席容蔡美碧同社企「對話體驗」常務董事朱月如都喺度。朱月如聘用唔少殘疾人士，佢話留意到一個現象就係擁有高學歷嘅殘疾人士愈嚟愈多，但可以畀佢哋嘅職場機會就好有限。佢認為只要有工作有收入，殘疾人士同一般人一樣，都能夠喺社會上搵到自己嘅位置同角色，從而扭轉殘疾人士係社會負擔嘅觀念。
楊大偉揀啱名堂推廣素食
致力推廣素食嘅楊大偉就話亞洲社會過去對素食嘅觀念非常負面，認為選擇素食若非有求於神明，就係遭逢諸如失戀嘅人生打擊，令佢感到要改變大眾對素食嘅成見，實在阻力重重。佢話今日素食文化能夠得到大眾接納，係喺多年來嘅努力推廣之外，採用合適嘅名堂都相當重要，譬如當初係用「食齋星期一」的話，成件事就可能衰咗啦！
社會創業論壇主席張益麟就話，社企雖然對社會使命滿懷熱情，但就未必有足夠嘅營商經驗，所以佢成立創業顧問及融資公司，為具有社會使命嘅初創企業提供巿場推廣同商業支援。
卓妮