政情：開門踢傷腳趾 葉傲冬長期踢拖
相信唔少人都感受過乜嘢叫十指痛歸心，行路撞親腳趾更加係常見情況，估計你同我都試過。油尖旺區議會主席葉傲冬近排都親身感受呢種痛楚，更搞到要長期踢拖示人添！
冇放棄興趣 改操練上半身
葉傲冬話腳傷係因家居意外造成，唔知係咪心神恍惚，當日開門時就踢咗落去搞到即場爆缸，而包紮咗大半日情況仍然又紅又腫，問過朋友後就話症狀似骨裂，直言只有將腳趾固定呢個方法可以做囉！
自從腳趾受傷，葉傲冬大部分時間都係踢拖見人，笑指街坊都睇慣其新造型，但早前出席一定要着鞋嘅場合，只係着咗半日就痛到頂唔順，而且腳趾情況仲惡化咗添，所以依家唔敢着鞋住，要繼續踢拖一段時間喎。
另外，向來熱愛健身嘅佢冇因骨裂而放棄興趣，仲話已經同健身教練商討只集中訓練上半身，而下半身只係一段短時間冇得練，相信唔會影響到健身成效。