政情：民望插水林鄭將缺席馬季開鑼

馬季即將開鑼，馬會尋日公布開鑼日安排，似乎新馬季有新安排，事關每年開鑼日會有特首高官主持打鑼儀式，但今年將改由香港賽馬會主席周永健主持喇！

香港喺今個暑假過得非常不平靜，每個星期都出現大型示威活動，繼而爆發衝突，社會氣氛相當撕裂，連帶特首林鄭月娥民望出現插水式下跌，成為回歸以來民望最低嘅特首。

不過，林鄭似乎再成為另一個回歸之最，就係開鑼日中敲鑼同埋主持醒獅點睛工作落喺周永健身上，連帶當日焦點賽事特首盃嘅頒獎工作都由周永健負責，有別以往由特首，或者政務司司長負責嘅安排喇，更有指係回歸以來，首次一個官員都唔到嘅開鑼日，唔通成個政府都唔見得人？

翻查資料，林鄭月娥之前連續七年出席馬季開鑼日，上任前五年均以政務司司長身份出席，所以佢上年主持開鑼時都忍唔住風騷自稱熟手技工，點知今年就不見蹤影，唔知匿埋喺邊喇？