政情：怕堵路塞機場爆鑊 陳帆取消休假
政府高官趁暑假排住隊放假，本來就輪到運輸及房屋局局長陳帆放假，仲計劃放到下月二日，喺正新學年開學日復工。但據了解，陳帆已喺早幾日取消休假，將會照常返工。最近反修例嘅示威同集會不斷，有時堵吓路，有時又塞吓機場，幾乎樣樣都同交通有關，依家火頭處處，陳帆作為交通嘅掌舵人，唔通取消休假係怕爆大鑊？
楊潤雄「趕開學」提早復工
政府憲報尋日公布，陳帆會由今日開始放假，埋單計數就放成九日，而喺佢休假期間，將會由副局長蘇偉文署理埋局長嘅職務。其實最近亦有局長取消休假，例如教育局局長楊潤雄就因為最近香港局勢問題，同埋要預備下個月學生開學嘅事，所以就縮短咗三日假期，提早放完假返港復工。
其實，兩位食物及衞生局常任秘書長亦輪流放假。憲報公布喺上月十八日已開始放假嘅食衞局常秘（衞生）謝曼怡，喺放咗超過一個月假之後，已喺今個月二十日復工。
喺謝曼怡放完假之後，就輪到另一位食衞局常秘（食物）容偉雄開始放假喇。不過暫時只係知道容偉雄喺本月十九日開始放假，未知幾時放完假，唔知會唔會又放成個月呢？