中環出更：歐遊多國食唔慣 王國強：都係香港好
香港人生活緊張，有時都要停一停、抖一抖，去旅行歎美食叉吓電。好似廣東社團總會永遠榮譽主席王國強咁，佢啱啱喺歐洲返嚟冇耐，仲話去咗咁多地方，試咗當地嘅特別美食，但好多時都唔習慣。
王國強呢次旅行去咗德國、匈牙利等多個東歐國家，終於去晒歐洲咁多個國家玩，但佢就話講到食嘢始終都係香港好，畢竟自己已食慣咗香港口味，直言冇鍾意食嘅嘢係香港搵唔到，就算外地餐廳係米芝蓮幾多星都好，感覺都係鍾意香港食品多啲。佢又以牛扒為例，有啲地方會食好生嘅牛扒，佢就食唔到，但喺香港唔單止有較合口味嘅牛扒，仲通常有幾個唔同價位可選擇，貴有貴食、平有平食添！
不過，香港中華廠商聯合會常務會董蔡少森就唔係咁睇嘞，講起過往好多時喺外地食嘅特色美食，質素都會較高，就好似香港好鍾意食嘅魚生，喺其他地方食可能會好唔同，有啲地方可以做到即捉、即劏、即食，相比之下香港好多食材都係運送進口，咁外地新鮮嘅自然好食得多啦！所以佢話自己都算係日本嘅常客，但就補充話唔止魚生有呢種情況嘅！
蔡少森又話好少為咗食而特意去某地方旅行，但去得旅行就會食當地最拿手嘅食品，而唔單止係食，旅行期間去玩都重要，更重要就係shopping（購物），仲笑話shopping唔係太太專利，佢去旅行時都買唔少咁話。
沈運龍勇嘗杧果辣椒雪糕
其實，另一名廠商會常務會董、喺珠寶界有「中東王子」之稱嘅沈運龍，早前都去咗墨西哥旅行，當然試勻當地嘅美食喇，佢仲喺社交平台上載咗好多相，唔單止有當地嘅美景，其中一張相係佢好似攞住支雪條，但又黃又紅咁，到底佢食緊乜嘢？佢仲貼文話「杧果和辣椒有可能做雪糕嗎？」仲話有啲怪怪哋，但又好過癮！又甜又辣，到底係乜嘢味，睇怕要食過先知嘞！
卓妮