政情：今日你上鏡：想坐「太空船」行醫 沈祖堯夢想成真
每樣發明真係要親身試過先知道成效係點，點解咁講呢？日前喺一個新聞發布會見到中文大學前校長沈祖堯醫生，問佢讀書時有冇發明一啲產品，佢話冇乜，因為讀醫科有好多書要讀，同埋有好多試要考，所以冇時間去諗咁多嘢，仲嘲笑自己淨係識讀書。
不過，佢透露睇過一齣戲，就係將一隻太空船縮細打入人體去到身體任何一個地方幫病人醫病，當時佢就覺得咁幾好吖，可以準確性幫到病人治標又治本，當時覺得將來如果可以做到呢樣嘢就好喇！
吞藥丸照腸
佢透露，因為科技進步，依家有類似治療方法出現，就係將一粒藥丸吞落肚直到腸嘅位置，仲可以有六小時錄影功能，可以準確地搵出病徵，佢話都親身試過吞嗰粒藥丸入去身體照腸，睇吓有乜問題出現，試過之後冇副作用亦唔辛苦喎。