政情：水務署回信寫錯名 甘文鋒斥俹簁
政府部門經常同地區人士聯絡，當中以書面聯絡最為常見，始終白紙黑字有記錄，唔怕無憑無據口同鼻拗，但從另一角度睇就係寫錯就有證有據走唔甩，好似屯門區議員甘文鋒近日就收到水務署回信，但就發現對方連最基本嘅收信人姓名都寫錯喇！
鋒變「峰」 成日被人寫錯名
甘文鋒日前喺Facebook上載一封水務署回畀「甘文峰」嘅信件，佢就話由細到大都經常畀人寫錯個「鋒」字，由金字部變山字部，所以都習以為常，不過佢同政府部門交手時都會奉上卡片，而去信對方都係以中文書寫，有寫到自己姓名，但最後回信出錯，坦言覺得政府部門有啲俹簁。
雖然姓名寫錯，但最重要內容收貨啫！佢都話今次去信水務署純粹想幫居民了解區內工程詳情，而呢封回信已經得到答案，講明區內水務工程係為居民而設，直言能夠令居民釋疑最緊要，寫錯名只係小事啫！