政情：教岑智明「講人話」林超英唔記得

「講人話」呢句話最近變咗唔少人嘅金句，天文台台長岑智明尋日喺社交網站透露，日前出席社福界一個活動分享時，被主持人要求佢用嚟做開場白。唔講唔知，原來呢句係出自佢恩師、天文台前台長林超英，但最有趣嘅係，竟然林超英都話唔記得有講過。

其實岑智明舊年喺電台節目都有講過，話林超英早喺十幾年前就快退休，同佢出去開會，回程時已同佢講要學識「講人話」。但林喺岑嘅網頁就留言話「受寵若驚」，主要係「驚」，又話唔記得自己有講過「講人話」，岑回覆時仲重提當年往事，林又再留言「又似係」，話信岑嘅講法。

岑智明將呢句話銘記於心，尤其天文台喺社交媒體同市民溝通，「貼地」、「互動」、「講人話」的確非常重要。佢估唔到呢句說話今日竟然會變咗城中熱話。

有眼利嘅網友留意到本來一頭白髮嘅佢，當日出席活動染咗黑髮，留言「岑台長你好似染咗黑髮喎」，佢嘅回應係畀咗「哈哈笑」，染咗髮嘅佢睇落都後生咗唔少喎。