政情：嘆生意難做 沈慧林試拓中東市場
香港經濟增長下滑，加上遊客量大幅下跌，前線銷售不但大嘆生意難做，連帶工業生產亦都叫苦連天。香港青年工業家協會執委沈慧林，本身雖專注於手錶製造而不涉零售，然而訪港旅客日漸減少，唔少售賣貴價手錶嘅店舖都少咗好多客，訂單亦難免削減。面對生意淡薄，佢話嘗試開拓中東市場。
成功研發木手錶
沈慧林話自家品牌嘅顧客群以內地人居多，少咗內地遊客，生意難免受影響。佢話本來有位上海客人來港傾生意，可惜後來都取消咗。有見及此，佢話不如走出香港博一博，譬如會親往上海接洽談業務，遲吓又會飛去杜拜，嘗試開拓中東巿場。佢話留意到中東人對於手錶嘅款式同外觀，有其獨特嘅美學要求，因此佢話會好好研究中東人嘅口味，以推出迎合當地巿場喜好嘅產品。
講起新產品，佢話剛成功研發木手錶，雖然係錶殼同錶面選用木材，但試製中途先至發覺，唔係所有木材都可以切割到紙張咁薄，結果要多番嘗試，至搵到合適做錶面嘅木材質料咁話。