政情：選舉處 失冊失腦再壞腦 300人登記唔到做選民

主動出新聞稿解釋道歉

選舉處尋日主動出新聞稿，話今年六月十四日至七月二日期間，約有六萬名市民透過「電子表格上載平台」（平台）遞交選民登記申請，使用量較平時大幅增加，而平台電腦系統喺嗰段時間內曾經數次出現技術性問題，因而令部分申請表格嘅電子檔案未能成功儲存喺選舉事務處嘅數據庫伺服器，因此未能進一步處理同納入《二○一九年臨時選民登記冊》內。

處方又話，由於選舉處嘅電腦系統無收集到上傳者嘅任何個人資料，包括IP位址，因此只能掌握有關申請嘅申請編號同進入系統嘅時間，今次涉及約三百四十六宗個案，上傳時間介乎六月十四日至七月二日，受影響個案的申請編號以R字頭起首，共有十六個字元。處方就事件向市民致歉，呼籲受影響人士盡快聯絡該處，而處方就會協助申請人按法例向審裁官申請批准，加入今年度嘅正式選民登記冊內嘞！

政制事務局發言人回應話，選舉事務處喺八月二十一日確定問題後，當日傍晚通報局方，而局方獲悉事件後，一直同選舉事務處保持緊密聯繫，並要求該處盡快公布事件，又話局方理解選舉事務處嘅「電子表格上載平台」電腦系統，喺事發期間所收到嘅選民登記申請數量較平時大幅增加，已責成該處檢視有關嘅電腦系統運作。

老貓燒鬚 聶德權難卸責

回帶睇睇，其實選舉處早喺二○一六年遺失咗新界西葵青區偉盈票站嘅選民登記冊，當中載有約八千名選民個人資料同投票紀錄，仲隱瞞咗兩年半先通報；而喺二○一七年嘅特首選舉就遺失咗兩部手提電腦，當中分別載有一千多名選委姓名同三百多萬名地區選民個人資料添。

話晒選民登記都涉及市民嘅個人私隱資料，一而再，再而三咁唔見，認真濕滯。今次仲「壞腦」，搞到市民登記唔到，負責統籌選舉事務嘅政制及內地事務局局長聶德權都有責任，政府一直推動選民登記活動，然後硬件未能支援，今鋪真係老貓燒鬚！