中環出更：被質問死咗去邊哪吒露肉踢走網民

依家網上欺凌嘅情況好嚴重，民意代表都成為攻擊嘅對象，好似西貢區議員方國珊（哪吒）咁亦受到類似嘅欺凌，被網民喺Facebook（Fb）留言，問佢凌晨兩點死咗去邊？佢就不惜「露肉」證明自己冇偷懶，仲趕涼薄網民出Group。

哪吒尋日喺Fb開Live，佢拎咗部手機出嚟展示一幅露肉照，背部皮膚變晒紅色，原來係去咗刮痧，睇嚟情況都幾嚴重吓。跟住就話有網民問佢前日凌晨兩點去咗邊？佢話梗係喺屋企喇，仲話做區議員真係好忙碌，佢嗰日就一日走四場，開咗四個會，直至夜晚先同屋企人食飯。

點解要展示露肉相嚟證明冇偷懶？原來係同嗰日將軍澳連儂牆斬人事件有關。佢引述有啲網民嘅留言其實係「凌晨兩點你死咗去邊？」佢話當時梗係喺屋企，而佢嘅團隊喺一點幾就去咗案發現場，而佢收到消息後四點幾亦到咗跟進，認為網民有關嘅留言實在太涼薄。

哪吒自言投入議會工作十一年，絕對唔容許有街坊受到傷害，又批評嗰啲二十幾歲嘅年輕網民唔應該咁涼薄對待區議員，亦唔應該周不時叫人「收皮」，佢直情叫抱住呢啲心態嘅網民同埋打手離開佢Fb，亦唔好睇佢Fb，以後大家唔好再溝通嘞！

卓妮

中環出更：被質問死咗去邊 哪吒露肉踢走網民