小明和小強是院舍的照顧員。他們每天工作均須佩戴衞生口罩工作。小明問：「小強，係時候又要考考你有關個人衞生的常識喇，知唔知點解大部分嘅衞生口罩都係由三層物料所組成呢？」小強答：「係唔係多幾層保護性就會強啲，可以更有效保護我哋嘅口鼻同呼吸道呀？」
小明續說：「答啱一半啦，其實衞生口罩嘅三層各有其功用。外層係用作防液體飛濺，中間嗰層用作阻擋病菌，而內層就係用作吸收自己釋放出嚟嘅濕氣同水分。所以口罩有分外同內，記住唔好反轉嚟用呀。」小強回答：「原來如此。佩戴口罩嘅重點，例如分辨內外、有金屬線為上方、使用時完全覆蓋口、鼻同下巴，同埋按壓金屬線使口罩緊貼面部等要訣外，我哋仲要注意啲乜嘢呢？」
小明補充：「小強，佩戴口罩嘅重點你都十分清楚，等我再講埋除低個口罩嘅衞生重點啦。記住即棄式口罩我哋唔應該重用，如有破損或者弄污都應該立即更換。除口罩前我哋應先洗手，口罩向外部分可能已受污染，我哋唔好觸摸佢呀，仲要棄置喺有蓋嘅垃圾箱內，然後再次清潔雙手。」
小強答：「原來口罩喺佩戴同除佢落嚟，都有咁多唔同嘅衞生常識要注意，睇嚟我都要不時照一照鏡，睇吓我嘅口罩戴得正唔正確，有無被污染同更換嘅需要。多謝小明畀我嘅職業健康資訊！」
職業安全健康局
www.oshc.org.hk