近期社會各區都出現激烈警民衝突，多區居民都有機會親身感受催淚彈嘅威力，葵芳就係其中一區，連日來身兼當區區議員嘅立法會議員梁耀忠（阿忠）都有為邨民發聲。不過，有讀者斥「梁耀忠不代表我」，最不滿係阿忠投訴阻黑衣人入邨嘅保安員，聽落該名保安好似冇做錯喎，但阿忠就有另一個版本，今次真係口同鼻拗喇！

警方曾喺港鐵葵芳站內施放催淚彈，而站外嘅附近街道都無一幸免，唔少住附近嘅葵芳邨嘅居民都受影響，所以早前阿忠就陪同十幾名葵芳居民開記者會，大數催淚彈嘅影響。不過，有居於葵芳邨嘅居民林小姐就不滿阿忠，認為佢令外界以為代表晒整條葵芳邨，加上佢覺得起因係有人搞破壞在先，自身又感受唔到催淚彈影響，而講到最不滿就係大廈保安員因阿忠投訴而換人喎。

林小姐話駐守其大廈嘅保安員已經年過六十歲，做咗幾年表現稱職，認得所有住戶而住得好安心，但近日就換咗人，替工話舊保安畀人投訴而調走。而佢更聽街坊講，舊保安因為阻擋身穿黑衣嘅陌生人進入大廈，所以換來阿忠投訴，而到依家都冇再見過對方，唔知係咪因而被炒，大鬧阿忠做法唔合理，因為保安並冇做錯，純粹趕走搞事分子，直指阿忠做法拎邨民條命較飛，如果保安被打爛飯碗，更同阿忠成日標榜為工人發聲嘅做法相違背喎。

阿忠就直認有作出針對葵芳邨保安嘅投訴，但強調只係轉介居民嘅投訴，向管理公司反映邨內現象，而以佢所知涉事保安未有被炒，管理公司只係將佢調離原有崗位作進一步調查同跟進。

阿忠更講出事件另一個版本，話當時有居民身穿黑衫，帶埋兩名同樣着黑衫嘅朋友進入大廈，點知不獲保安放行返屋企，更要求講出其寓所單位，認為事件涉及私隱問題。阿忠更話，今次邨內唔止單一保安有問題，認為任何人嘅工作最重要合規矩，佢已經安排咗管理公司同邨民就保安問題討論喎。

今次保安事件都演變成兩個各自對自己有利嘅版本，足證近期社會相當撕裂，如果社會氣氛繼續，睇怕呢類爭拗都會因社會對立而陸續有來囉！