政情：陳淑莊《激光中》完成電療
因違法佔領行動案被判囚八個月但獲緩刑兩年嘅立法會議員陳淑莊（Tanya），早前做完切除腦腫瘤術後要進行六星期嘅電療，佢喺Facebook 貼文，話尋日喺已故歌手羅文嘅經典歌曲《激光中》完成最後一次電療。早前反修例惹起雷射筆風波，可能因為咁，所以醫護人員特別為佢播呢首歌。
Tanya喺貼文中話由四月中得知有腦瘤，五月初做手術後，喺六月中決定開始健身，準備面對電療過程同副作用，而喺七月初開始做電療，至今為期六星期，而尋日朝早喺《激光中》嘅歌聲下離開電療室，並再次感謝各醫護人員，讓佢喺激光中順利同安心地度過整個療程，又話唔會再令大家為佢擔心添！
早前都講過，喺十月新一個立法年度，民主派會議召集人將會換人，人選之一屬意由Tanya接任召集人，據悉當時佢則強調要視乎健康情況而定。