政情：立會玻璃疑被射穿窿 秘書處報警
喺七一嘅反修例衝突，立法會被大肆破壞，畀示威者打到爛蓉蓉，而喺前日嘅818反修例集會後，尋日發現立法會大樓多處穿咗窿，懷疑係遭射擊破壞，現場更發現一粒彈珠。到底喺邊度中招？
民建聯樓層中招
民建聯尋日下晝喺Facebook 上載多張圖片，話立法會五樓同六樓嘅玻璃穿咗窿，而六樓就係該黨議員嘅辦事處，而喺冇耐，佢哋又上載照片，指秘書處已喺玻璃爆破之處封咗白紙，相信係防止再掉下玻璃碎。
唔單止該黨樓層嘅玻璃中招，立法會秘書處回覆查詢時話，喺立法會大樓外嘅示威區（俗稱煲底）外牆一塊玻璃，以及五樓同六樓面向中信大廈嘅兩塊玻璃都穿咗窿，而煲底地下亦發現有一粒彈珠，立法會秘書處懷疑係被射擊而造成破裂。秘書處已就事件報警並通知建築署，警方亦已完成搜證工作。
其實民建聯嘅樓層爆玻璃亦有前科，話說舊年八月初，立法會大樓五樓同六樓之間都爆咗玻璃，仲要圍封大樓外部分嘅行人路添！連續兩次兼且仲係八月中招，究竟係該黨黑仔抑或嗰個樓層風水唔好呢？