政情：白鴿黨調查報告未出 許智峯黨籍先解凍
涉強搶保安局女行政主任手機嘅民主黨（白鴿黨）立法會議員許智峯（峯鴿），早前已被法庭判罪成，要做社會服務令同罰款，但黨內凍結黨籍兼紀律聆訊仲未了事。據了解，白鴿黨紀律聆訊委員會嘅調查報告未出，但中央委員會已率先喺上個月通過解凍峯鴿嘅黨籍嘞！
峯鴿接受查詢時承認黨籍已被解凍，據佢所知呢個決定醞釀好耐，因為距離事件發生已經超過一年，有黨友覺得凍結咁耐好似有啲唔公道喎，而中委會有權力去決定解凍，同紀委會無直接關係，一再重申自己係認同及尊重黨嘅做法。至於紀委會報告，佢就話上周五已出席聆訊，希望本周四中委會會議前有報告，屆時就可以討論埋啦！
已開始履行社服令
佢又透露已經開始做社會服務令，喺一間機構內做圖書館管理員，執吓書同睇書。問到有冇人認得佢？佢話都有嘅，但因為係內部工作，較少對街外人。