政情：尹兆堅越級提草案 梁君彥落閘
香港近期示威衝擊場面不斷，全因政府提出要修訂《逃犯條例》而惹起軒然大波。雖然相關修例工作已經壽終正寢，但既然政府嘅初心，過去都有立法會議員提出私人條例草案，希望去處理政府所指嘅法律漏洞，又可減低市民疑慮。立法會議員尹兆堅早喺今年五月着手有關工作，早前提出越級要求，希望直上大會及早首讀，但尋日就畀立法會主席梁君彥正式落閘喇。
《逃犯條例》修訂搞到滿城風雨，呢場風暴早喺今年二月來臨，先喺立法會層面發酵，好似兩次法案委員會無法選出主席、破天荒出現法案委員會鬧雙胞胎、議會上有肢體衝突等，再逐步發展至政府宣布跪低暫緩修例，但到今時今日仍未平息風波。
曾撤草案 泛民認錯判形勢
而喺政府宣布暫緩修例前，早有泛民議員提出私人條例草案，希望減少社會憂慮，又可以幫死者沉冤得雪，但議員楊岳橋喺上月獲特首辦通知不准遞交審議，而議員張超雄就惹來重推修例疑慮而認衰，承認錯判形勢而撤回。
至於尹兆堅嘅私人條例草案則喺上月尾獲律政司發出證明書，之後喺上星期去信梁君彥，話明白要先經事務委員會討論，但因為台灣殺人案疑兇將喺十月出獄，所以想盡早首讀，希望梁君彥安排到喺最近期嘅立法會會議，或者召開特別會議去處理喎。
梁指議員需依照程序同慣例
不過，梁君彥尋日就透過秘書處回信決定揸正嚟做，信中指議員法案要依照程序同慣例，提交前應先諮詢事務委員會，之後主席先會徵詢政府意見，考慮埋提出法案嘅議員回應先作出裁決。信中又解釋，面對其他私人條例草案都有要求注意程序同慣例，楊岳橋當時都有諮詢保安事務委員會，所以尹兆堅都要一樣先諮詢咗法案委員會，對其越級要求正式落閘喇！
尹兆堅就批評梁君彥封殺協助討回公道嘅最後機會，證明梁君彥同政府過去係假惺惺，並非真心想死者沉冤得雪，再者時間緊迫，休會期間要先經事務委員會討論並唔合理，希望梁君彥要有同理心。
其實，自從政府跪低後，建制派同政府都好似冇再跟進呢件事，而疑犯出獄日子正在倒數，十月刑期屆滿時真係好大機會可以重獲自由。