中環出更：市民質疑Cap水 長毛即捐錢民陣解圍
社民連成員「長毛」梁國雄雖然已經被褫奪立法會議員資格，但係每逢遊行「大節日」總會見到佢嘅身影，兼且不時會見到佢攞住籌款箱四圍抓錢搵銀。最新網上流傳一段短片，相信係前日嘅港島區遊行發生，有市民見到有籌款街站即場數錢，質疑長毛想Cap水，立即拍片當面對質！
即場街站數錢
短片長約兩分鐘，一開始就聽到一把女聲不斷叫囂「你點可以咁做？啲錢係公開嘅」，但未知佢鬧緊邊個，而街站一名女子就話要即場數錢，雙方開始有小爭執。及後長毛就攝入鏡頭話：「等我嚟，我解釋最準確！」佢繼續話，明白大家都關心啲錢點使，程序公義出咗問題，所以決定依家數錢，之後以長毛名義捐畀民陣，由民陣去用筆錢，大家可以查得到，呼籲大家唔好咁小事都嘈喎。
雖則之後再冇人出聲反駁，但從其他相片見到，街站附近包括大批示威者，更有人蒙面，相信當時群情洶湧，而且始終市民係真金白銀捐出嚟，有心想幫助某啲團體或人士，如果畀別有用心嘅人用咗，呢件就肯定係大事嘞！
卓妮