中環出更：學習壓力似交稅 梁賀琪：避無可避
香港填鴨式教育遭人詬病，好多家長安排仔女入讀國際學校。有「補習天后」之稱嘅仁愛堂總理梁賀琪（June），話依家香港嘅國際學校愈開愈多，亦漸漸變得本地化，加上學習成效未必勝過「土炮」學生，況且部分國際學校為提升學生成績，採取增加功課同測驗嘅手段，佢話學習壓力就好似交稅，儘管設法逃避，但最終都係避無可避。
June喺日前應菁英演講會之邀，講吓對國際同本地學校嘅睇法。佢話就讀國際學校嘅好處，係學習環境較輕鬆之餘，又可操得一口流利嘅英文，但礙於對中文嘅要求唔高，家長要盡量同仔女用中文溝通之外，仲需要長期補習中文，先可應付將來喺香港發展嘅需要。
學校教育遠不及家教重要
佢又話本地傳統學校嘅學生只要有中上嘅成績，轉讀國際學校係好容易適應；但倒轉係國際學校嘅學生，一旦轉讀本地傳統學校則非常困難，因此家長必須有相當穩健嘅經濟收入，至好考慮畀仔女就讀國際學校。佢話無論就讀邊間學校，其實都遠不如家教咁重要，佢認為當小朋友開始掌握語言能力，就要佢熟讀十誡、弟子規或三字經，以建立親子之間對是非判斷嘅共識。
金紫荊女企業家協會副主席沈貝嘉同執行委員張蕙然都有嚟聽。沈貝嘉話因為唔想過早催谷下一代，所以送囝囝到國際學校就讀，但唔同意年紀小小就去補習。佢憶起自己讀小三開始，媽咪就為佢安排補習數學嘅課程，連續三年嘅惡補雖令佢容易適應中學嘅數學，但亦導致佢對數學失去興趣。菁英演講會創會會長趙彼德就話自己命帶文昌，過去喺本地學校讀書經常名列三甲。雖然成績唔錯，但佢話必須終身學習以迎合社會嘅轉變。
卓妮