政情：今日你上鏡：錢慧儀孖細女睇珠寶

日前見到東華三院副主席馬清揚嘅太太、前港姐錢慧儀（右）孖住細女（左）行街，見佢清減咗唔少喎，之後佢哋入咗太子大廈一間珠寶店，睇咗十五分鐘後就離開。行去同佢打招呼，問係唔係買首飾？佢話唔係，只係經過搵朋友傾吓偈。問兩母女咁開心行街嘅？佢話趁個女未返英國之前出嚟行吓囉！呢排咁亂擔唔擔心機場上機有問題呀？佢話早排都擔心，但依家情況好轉咗應該唔怕啦！再問點解瘦咗咁多？佢話因為屋企發生咗啲事，同埋早前做嘢時整傷咗右手搞到好唔方便，但係依家隻手好咗好多喇，冇乜嘢咁嘞！之後就同記者道別，兩母女繼續去行街。