中環出更：拍片讚玩具BB 陸頌雄想生多個？

其實呢個玩具BB會發聲，係幫助一啲患認知障礙症嘅長者嘅，亦都令佢哋有啲心靈慰藉，記番起啲仔女同啲孫，陸頌雄話呢個玩具BB，令佢印象好深刻。唔係呀？拍短片講買玩具？

向長者宣揚樂齡科技

呢段短片係陸頌雄帶咗兩個長者參觀喺理工大學嘅賽馬會智齡匯體驗中心拍嘅，希望長者了解更多樂齡科技嘅資訊同產品，包括多款助行拐杖、用魔術貼取代衣服上嘅鈕扣，方便患有柏金遜症或容易手震嘅長者穿上衣物，同切合唔同病患需要嘅餐具，而發聲公仔當然包括在內，陸頌雄仲同啲長者一齊睇電視做運動添！

佢話早前做過調查，結果發現有八成受訪嘅長者支持居家安老嘅模式，而喺安老院舍宿位嚴重缺乏下，要令更多長者能夠居家安老，佢將會做更多嘢，當然包括建議政府要撥更多資源，資助長者買適合佢哋用嘅樂齡科技產品，令照顧者同長者都放心同安心喺社區生活。睇怕陸頌雄必須追瘦政府，勞工及福利局局長羅致光收到未？

卓妮