中環出更：潘陳愛菁為家己冷 酷熱照辦盂蘭文化節
今個夏天異常高溫，更有機構指上月係有紀錄以來最熱，難怪離開冷氣房一陣已經滿頭大汗喇。近日維園就有團體舉辦盂蘭文化節，主辦單位香港潮屬社團總會嘅副主席潘陳愛菁話面對酷熱天氣都要堅持搞。到底係愛定係責任呢？
活動當日正值酷熱天氣警告生效，但依然吸引唔少老友記到場參與，難怪潘陳愛菁話活動已經連續幾年舉辦，成為咗唔少潮州人期待嘅活動，順勢可以聯誼，而且可以為近期香港亂局祈福咁話。現時全球都面對氣候變化問題，佢都話要注重環保，好似今次活動中用嘅杯全部都問其他機構借用，用後交還重用減少浪費，而佢個人層面同樣支持環保，最起碼做到唔浪費食物喇！
林超英教路心靜自然涼
總會永遠榮譽主席莊學山、名譽顧問胡楚南等都有到場支持，仲有「家己冷」立法會議員柯創盛、姚思榮同鄭泳舜，連經常分享慳電節能嘅天文台前台長林超英都有出席。
林超英講起高溫就大嘆「全球暖化嘛」，但佢依然盡綿力去改變呢個現象，繼續分享既節能又有助忍受酷熱嘅方法，就係「心靜自然涼」喎。此外，佢話太太最近買咗部水冷風機，利用蒸發原理將空氣降溫，佢話呢種降溫方法比用冰塊更明顯，所以面對現時高溫破紀錄都唔使開冷氣機。
氣候變化同旅遊業都有關係，業界代表嘅姚思榮解釋，旅行社都會用呢樣嘢作為噱頭，好似以前會落力推銷有沉沒危機嘅馬爾代夫，現時就有旅行團搞睇冰川、遊威尼斯等。
卓妮