政情：黃偉鴻食多咗越南腰果 搞到肚腩變大咗
日前喺會展舉辦美食博覽，喺啲攤位發現一個人熟口熟面，又不停地打點貨品，睇真啲原來係品牌發展局副主席黃偉鴻（Ellis），走上去同佢打招呼，問佢點解會喺呢度出現？佢話自己代理食品牌子有份喺度擺攤位，所以有時間咪過嚟打點吓囉！
代理好多食品品牌咪好有口福？Ellis話都係o架，不停有新產品要試食好似（白老鼠）咁，就好似最近越南嚟嘅腰果，因為味道好，不經不覺又食多咗，所以搞到個肚腩都大咗少少出嚟，依家一有時間就要keep fit吓控制番個身形，問到要攞食品代理權要點樣選擇食品？佢話首先要認真地不停去試味道，同埋要多啲人一齊食，集合其他人意見再做決定。
話唔同水溫煮麵會唔同味
薯片食得多好熱氣喎，佢話飲多啲茶可以解決到，仲話試過喺代理啲日本同韓國麵返嚟之前，就會喺屋企煮嚟食，用唔同時間同水溫煮出嚟嘅麵會有唔同嘅味道添！