政情：機械「金仔」沖奶茶 楊偉雄：齒頰留香
開口埋口都係「智慧城市」同「新科技」嘅創新及科技局局長楊偉雄，尋日為一個奶茶比賽擔任評判時，不忙講吓香港創科有幾威。佢提到早前喺日內瓦發明大獎入面拎過獎嘅人工智能奶茶沖製機械人「金仔 KamChAI」，話頭先飲咗「金仔」所沖嘅奶茶，大讚「金仔」有料到，拍得住茶記水準，又話自己飲完十分鐘之後，仲係口齒芬芳、齒頰留香咁話。佢擺明係賣花讚花香喇！
陳百里拉茶技巧純熟
雖然創科好重要，但楊偉雄都講到沖奶茶最重要係人投入嘅工夫，又話奶茶係由唔同茶葉組成，體現咗中西文化交融嘅獨特性，有海納百川、和而不同嘅意味，亦正正可體現到香港獨有文化精神。
另外，商務及經濟發展局副局長陳百里都有份做評判，仲參加名人示範賽，上台示範即沖奶茶。佢口講冇乜點練習，但拉茶技巧睇落好純熟，都拉得似模似樣咁。
