政情：指有人口講「我愛香港」 梁卓偉：實則想攬炒
反對修訂《逃犯條例》衝突持續，香港大學醫學院院長梁卓偉對前景感到非常憂慮同唔樂觀，形容社會當下嘅鬥爭好似無人駕駛嘅高速列車般失控。佢相信今次事件嘅牽連會比「六七暴動」更廣，更令佢懷疑各界真心想收拾眼前亂局，還是想出現「粉身碎骨」、「攬炒」結局，佢話：「一些人口中的我愛香港，到底是真心還是假意？」
唔可能利用暴力展現母愛
梁卓偉喺電台節目中讀出寫畀醫學專科學院創院主席、已故港大榮休教授達安輝嘅信。信中佢以《列王紀》內，兩位婦人喺所羅門王面前爭奪一個嬰兒嘅故事，比喻社會對立狀況。佢話故事中所羅門王亦難以分辨邊個講大話，但佢相信只要肯花多啲時間，總會睇得出，因為真正嘅母愛唔係靠口講、唔係靠眼淚、唔係靠喝斥，更唔可能利用體罰甚至暴力嚟展現；真正嘅母愛，應該係堅定、恒久、無條件同願意為兒女犧牲。
佢話當前嘅香港畀唔同嘅力量大力拉扯，絕大部分無權無勢，但全心全意愛護香港嘅香港人只能喺旁邊乾着急，又話每名醫科生開學就要誦讀嘅希克波拉底誓詞，當中首誡條係「先勿傷害」，佢祈求不論係示威者或警察，都要保護傷者、醫護同香港。