政情：赴美反映修例風波起因 葉劉：唔再畀人抹黑香港
新民黨主席葉劉淑儀尋日啟程赴美，參加喺蒙大拿州當地智庫主辦嘅「港美議員交流會」，佢喺Facebook貼文話希望借呢次機會，同美國反映香港近期修訂《逃犯條例》引起風波嘅因由、「一國兩制」嘅落實同本港民主自由人權狀況等等嘅議題，佢話會盡量發放正面訊息，等香港唔會再畀人抹黑。
葉劉話，眾所周知，近排香港都有唔少政界人士去美國，就住各種議題進行投訴，甚至有人要求美方制裁香港，所以佢今次訪美會抱住反映香港真實狀況嘅心態，如實表達意見。
民主派早前展開唱衰之旅
其實過去民主派周不時都會去外國講香港情況，被外界批評係唱衰香港，公民黨嘅楊岳橋同郭榮鏗早兩日就展開唱衰之旅，喺亞洲協會總部出席座談會，同各界人士討論近期香港嘅示威活動，又喺會議期間展示警方喺港鐵站發射催淚彈、示威者受傷同永久失明嘅照片。
出席今次同美國議員嘅交流會，香港嘅建制派議員包括葉劉同自由黨黨魁鍾國斌，泛民就有楊岳橋、郭榮鏗、民主黨涂謹申同教育界葉建源，美方代表則有四名嚟自共和黨同民主黨嘅議員。