中環出更：湯家驊倡設特赦名單 陳曼琪斥不公義
呢兩個月反對修訂《逃犯條例》嘅行動愈演愈烈，行政會議成員湯家驊尋日出席電台節目時建議成立「真相與和解委員會」，委員會可向特首建議特赦名單。香港中小型律師行協會創會會長陳曼琪狠斥湯家驊嘅建議不公義，唔單止將香港法律制度連根拔起，根本就係爭奪政府嘅管治權。
身兼資深大律師嘅湯家驊話，由佢創立嘅民主思路參考咗海外經驗，建議成立「真相與和解委員會」，有別於坊間爭取嘅獨立調查委員會，目的係要令社會復原，而唔係懲處任何人，委員會亦可以向特首建議特赦名單。
陳曼琪指一四年違法佔領行動至今，有部分人仍未被起訴，已向社會發放錯誤訊息，令部分犯咗法嘅人可以逃避法律責任，而湯家驊倡設嘅委員會冇法理基礎，更加係一個政治性嘅委員會，若可提出特赦名單，即係取代律政司嘅檢控職能，唔單止係衝擊政府管治，根本係爭奪政府嘅管治權。佢直斥湯提出嘅建議唔公義，違背法律面前人人平等嘅原則，強調現時必須盡早停止暴亂，盡快檢控犯法嘅人同交由法庭審理。
陳雲生斥提特赦係越俎代庖
時事評論員陳雲生狠斥湯作為資深大律師唔應該提出呢種不負責任嘅言論，建議只會添煩添亂，委員會可提出特赦名單根本係越俎代庖，令現時參與遊行嘅年輕人有不必要嘅期望，以為毋須承擔法律責任，更加有恃無恐，做出更激烈嘅行動。
卓妮