政情：公民講場：明日大嶼 黃偉綸計唔掂數 遲做不如唔好做

政府去年提出造價逾六千億元嘅「明日大嶼」填海計劃，用意係解決長遠嘅房屋短缺問題，不過就畀人鬧爆，其中一個原因就係造價太過昂貴。根據政府往績，分分鐘又因為超支搞到要過萬億元先至埋到單。有立法會議員尋日喺電台節目當中就提到，喺目前嘅社會氣氛底下推出明日大嶼填海計劃會有阻延，相信都要延期半年至九個月先得，仲提出咗其他短期房屋措施，例如興建過渡性房屋。不過查實造價昂貴先至係明日大嶼為人詬病嘅一大原因，而愈遲推行亦只會令造價愈昂貴。所以話呢，與其推遲計劃繼續被人鬧，發展局局長黃偉綸不如考慮吓撤回明日大嶼呢個倒錢落海方案好過喇。