政情：新聞處長朱曼鈴 帶埋歪風掌郵政
政府尋日宣布高層官員調動，政府新聞處處長朱曼鈴將於今年九月九日出任香港郵政署長。朱掌管新聞處時頻頻甩轆，試過發布政府新聞稿時刪減傳媒提問，結果惹來批評，又試過強制性公積金計劃管理局委任新高層時，連人名都可以寫錯。唔知呢股求求其其甩晒轆嘅風氣，會唔會傳埋去郵政署喇。
五高官大調職
朱曼鈴掌舵下嘅新聞處多處出事，連政府最高層都忍唔住要出聲話要改善，而依家朱就要調走喇。而喺今次呢輪高官任命當中，唔止朱被調離新聞處。康樂及文化事務署署長李美嫦亦將於九月十日起，出任財經事務及庫務局常任秘書長（財經事務），接替即將展開退休前休假嘅黃灝玄。而政府產業署署長劉明光亦將於十月四日出任康文署署長。康文署亦係問題多多嘅部門，劉係咪搞得掂，料好快就會揭曉。
此外，教育局副秘書長鄭偉源將於八月二十九日起，出任政府新聞處處長。香港駐歐洲聯盟特派代表林雪麗就會喺九月二日開始，出任行政長官辦公室常任秘書長。