政情：橫額被指鼓吹暴力 劉勇威稱大惑不解
區議員同立法會議員嘅宣傳橫額喺本港隨街可見，不過掛橫額有相關規定，有違規定或會被投訴舉報。大埔區議員劉勇威最近亦都因為橫額問題被投訴，有市民就不滿佢橫額上嘅標語有鼓吹暴力嘅意識，仲話覺得非常反感喎。到底劉用咗啲咩標語咁暴力呢？
上周一全港多區都有罷工集會，大埔都係其中一區。根據劉勇威喺社交網站嘅貼文，有自稱大埔市民喺上周三，即罷工集會後兩日打電話投訴，批評劉喺橫額貼咗同遊行集會有關嘅標語。
劉勇威回覆查詢時話，佢啲橫額一向都係講工作報告，今次投訴者冇講明係邊幅橫額有問題，而佢本身喺上周一罷工集會嘅地點附近掛咗兩幅橫額，所以估計投訴者係指呢兩幅。佢認為區議會嘅職責係要協助社區，保障社區安全，呢兩幅橫額分別係講長者覆診同埋天后宮，純粹提醒集會人士附近有相關設施，同暴力並冇關係，直言自己都大惑不解咁話。