政情：撐反修例捱轟 田北俊鍾國斌被促下台
政府修訂《逃犯條例》引起紛爭至今未平。自由黨榮譽主席田北俊（田少）早前公開批評政府修例工作，更要求支持修例的該黨主席張宇人辭去行政會議成員職務。而該黨黨魁、紡織及製衣界立法會議員鍾國斌亦曾建議政府撤回修例同成立獨立調查委員會。點知呢個修例風波就燒到去該黨，有自稱「一眾多年來熱愛自由黨的兄弟姊妹」就去信黨高層炮轟田少等人，仲話要成立一個反田少等人嘅群組，要求佢哋下台。
斥田少令自由黨變建制叛徒
該封信收件人包括田少、鍾國斌、張宇人、該黨航運交通界議員易志明，以及同係榮譽主席嘅劉健儀同周梁淑怡。信中指出，佢哋不滿鍾要求撤回修例同成立獨立調查委員會，因為咁做等同代表該黨支持破壞法治嘅反對派黑衣暴徒，又重提當年政府就《基本法》第二十三條立法一事，對田少當年錯誤地代表該黨不支持立法表示強烈不滿，仲話當年令該黨變成建制派叛徒。
信中又指，田少當初已行錯第一步，令一眾青年會員失去向上流空間，故現要求田少等黨高層下台，並會聯同黨內各階層一同退黨，仲警告勿低估同忽視佢哋勢力，否則必定後悔。佢哋仲話，如再發現田少等人做出損害該黨行為，就會展開懲罰行動，正式象徵「老人政治」時代過去。