政情：避政司司長鄭若驊齋講溝通 網誌治港 匿埋山窿
本港呢兩個月以來社會動盪不安，七國咁亂，但引起呢場政治風暴嘅始作俑者律政司司長鄭若驊就一直「龜縮」，好似對社會無日安寧視而不見咁，淨係識得匿埋寫網誌。尋日鄭又再化身「鍵盤戰士」，話政府十分重視同年輕人溝通，鼓勵法律學生要多啲「走出去」，多啲介紹一下香港嘅法律制度同埋優勢，宣傳香港。鄭叫學生「走出去」，自己就匿埋做「鍵盤戰士」，宣傳香港法律制度本來係律政司司長工作，但佢就叫啲學生哥幫手，真係笑大人個口。唔怪得有時事評論員鬧爆佢行徑矛盾，得個講字，仲叫佢快啲面對公眾啦！
卸責學生哥 有會議都唔去開
政府原本計劃修訂《逃犯條例》以處理台灣殺人案，鄭若驊作為律政司司長，理應做好修例解說工作，點知佢就做咗「避政司司長」，立法會嘅相關會議都唔去開，最終令到修例觸礁收場，仲引發持續超過兩個月嘅亂局，政府依家都唔知點收科，而最離譜嘅係鄭竟然一直龜縮做blogger（博客）當交功課，冇企出嚟為政府拆彈。
鄭若驊尋日又再發表網誌，話自己早前同一批曾到內地實習嘅法律學生會面，有學生明白必須將目光放遠，多啲留心國家同世界發展，以開放態度接觸人和事，先至能夠自我增值。佢仲話，自己有鼓勵學生體驗不同法律制度嘅同時，都多啲介紹香港法律制度同優勢，仲夠膽形容自己同法律學生會面，係律政司配合政府施政新風格嘅第一步，嚟緊會繼續帶嚟新嘅安排，等政府能夠更掌握民情喎。
陳雲生斥：成篇文都係公關騷
時事評論員陳雲生就鬧爆鄭若驊「得個講字」，直斥鄭若果一早就修例同廣大市民做好溝通，就唔會搞到如斯田地：「難聽啲講，成篇文都係公關騷！」陳仲話，鄭嘅文章同佢依家嘅行徑互相矛盾，佢就估計可能係鄭早前被中央「提醒」，所以才敷衍發文聲稱會多啲同年輕人溝通。陳就建議鄭先做好本分，立即解決當今亂局：「同啲法律尖子對話有咩用？今次衝突源頭係一群睇唔到自己有前途嘅年輕人。」認為如果唔想再有更多年輕人受到唆擺參與示威，鄭就應盡快面對公眾咁話。