中環出更：立會外訪芬蘭 三議員退團
立法會間中都會有外訪考察，其中教育事務委員會喺下個月到芬蘭訪問，原定有十位立法會議員隨團外訪，但近日就有三位議員決定退團，分別係張國鈞（Horace）、鄭松泰，同埋體育、演藝、文化及出版界嘅馬逢國。Horace仲直言係因為香港近期嘅情況令人擔憂，所以就決定留守係香港喎。
張國鈞留港 望盡快平亂
政府修訂《逃犯條例》觸發連場社會衝突，上個月立法會就因為衝擊事件搞到開唔成會，一眾立法會議員都提早放暑假。可惜嘅係近日香港社會立立亂，唔少議員都冇得抖。一向關注教育事務嘅Horace坦言，原本都想去考察，不過因為香港嘅情況，認為依家變化太快，所以先決定留守香港，希望可以盡快解決亂局。佢仲話，亂局未平息，就算有咩教育政策都做唔到。Horace仲係行政會議成員同中西區區議員，作為三料議員自然好多嘢要兼顧，難怪要作取捨喇。
至於鄭松泰就解釋話因為收到唔少法律求助，擔心離開香港嘅話會難以交畀其他人處理，所以留低。佢又覺得香港冇普選，考察對教育制度改革冇實質幫助，而且行程縮短咗，為去而去意義不大，所以都決定退團囉。
卓妮