中環出更：「奶爸」黃浩鈞 一日飲廿杯奶茶
老師對家長嘅了解好多時都嚟自小朋友。香港餐飲聯業協會副主席黃浩鈞（Howie）就畀囝囝嘅老師誤以為佢係「奶爸」，不過就唔係指專心照顧小朋友嘅「奶爸」，而係「奶茶爸爸」。皆因做飲品生意嘅佢不時都會沖奶茶，所以囝囝就成日同人講︰「我爹哋沖奶茶（口架）」，搞到連囝囝嘅老師對住佢時都問︰「你就係沖奶茶嗰個爸爸？」
Howie尋日出席一個沖奶茶比賽時話，自己高中喺外國讀書，每年暑假回港都會學沖奶茶。佢依家為咗生意，要試唔同配方，試過最高峰一日要飲廿杯奶茶。佢又話，自己都識得拉高手撞茶，以沖出靚奶茶。咁最高拉到有幾高？佢就笑笑口話唔夠身旁嘅香港中華廠商聯合會常務會董陳家偉咁高喎。Howie又打算教定啲仔女沖奶茶，第日送佢哋去外國讀書時，佢哋都可以沖畀外國人試吓喎。
同場仲有Howie爸爸黃家和、廠商會副會長黃震、香港工業總會副主席莊子雄同香港品質保證局副主席何志誠。黃家和親自教立法會議員葉劉淑儀（葉劉）沖奶茶，台下都聞到奶茶香。葉劉話去美國讀書時，每星期都會去兩次茶餐廳買奶茶飲，仲話港式茶餐廳幫佢克服思鄉之情添。鍾情於港式奶茶嘅佢又提到，雖然依家唔少人飲奶茶會叫少甜少奶，但佢唔會，因為一定要足味道，至多飲少啲咁話。
莊子雄怕肥 通常要走甜
莊子雄就話每日一係飲咖啡，一係飲奶茶，叫奶茶通常會叫「走甜」，因為怕肥喎。而佢喺飛機上都會叫港式奶茶，味道都唔錯咁話。而尋日個比賽，最終就由中山嘅代表陳進良勝出。睇嚟奶茶文化依家喺內地同香港都咁盛行喇。
卓妮