「燒賣蝦餃每樣來一碟啦，剔多碟叉燒腸！」均叔、英哥及阿好三人正在茶樓內進食午餐，氣氛一片融洽。
正當英哥飲咗啖茶，諗住夾舊燒賣之際，突然揞住個肚，痛苦地慘叫：「斃！慘啦！慘啦！又開始嚟料啦！大鑊啦！要去廁所先！」講完就衝去廁所。
均叔：「咩事，英哥大汗疊細汗咁，無嘢呀嘛？」
阿好：「哦，英哥嘅腸易激綜合症發作，畀佢去解決啦。」
均叔：「咩腸易激綜合症？」
阿好：「均叔，腸易激綜合症是一種腸道生理功能紊亂的疾病，徵狀包括腸道蠕動異常、長期腹痛或腹脹、大便習慣改變，例如便秘、腹瀉，又或兩者交替出現、大便質地變得過硬或稀爛等，仲可以分為便秘型、反覆腹瀉型及便秘腹瀉兩者混合型。」
均叔：「點解英哥無喇喇有呢個綜合症？」
阿好：「雖然腸易激綜合症的確切成因不明，但如果平時有不良的飲食習慣，例如飲食不定時，長期進食少纖維、高脂肪或高糖食物；不良的大便習慣，例如慣性地強忍大便；仲成日精神緊張呀；呢啲都係重要的影響因素。」
均叔：「咁有冇得搞？ 」
阿好：「平時要保持健康的生活模式，養成良好的飲食習慣，包括多吃纖維豐富的食物，仲要戒煙；同埋要保持心境開朗，如果經常精神緊張及感到工作壓力大，就應接受心理輔導；並尋求醫生建議有效的治療方案，例如服用相關藥物。」
均叔：「阿好，睇唔出你咁犀利，識咁多嘢？」
阿好：「唉，均叔，我係便秘型呀！慘啦！我都來料！我都要去廁所坐一陣！」講完就衝去廁所。
職業安全健康局
www.oshc.org.hk