政情：八網難逃：梁繼昌孖南韓議員整心心
立法會議會聯絡小組委員會副主席梁繼昌（Kenneth）近日喺社交網站上載咗一張同韓國國會議員Lee Jung Hyun嘅合照，佢哋喺立法會大樓內見面，仲一齊整手指心心嘅手勢添！其實呢個手指心心嘅手勢係唔少韓星影相時嘅招牌動作，唔知大家覺得Kenneth同韓國國會議員邊個做得正宗啲呢？
Kenneth話今次見嘅呢位李先生係前輩，仲同佢分享咗一個韓國議會笑話，話如果沒有選舉，國會議員係一份好好嘅工作。睇嚟韓國國會議員同樣唔易做，唔知佢今次嚟到香港立法會，見到大樓咁多地方有損毀，會唔會覺得喺香港做議員同樣唔容易呢？
工作內容大致相同
Kenneth又話今次交流發現香港立法會同韓國國會嘅工作內容大致相同，連會期都差唔多，同樣係大約八個月，但係原來韓國國會九月至十二月期間會每日舉行會議，其餘都係雙數月份先會開會咁話。