政情：預告10月出冊 邵家臻又刷存在感

邵家臻託臻辦喺Facebook貼文講述近況，話依家距離佢出冊之日（10月3日）唔夠兩個月，好快就歸隊。由於佢糖尿上眼，上次講過話要排期打第四針，呢次就報平安，話已經打咗嘞，目前情況穩定，叫大家唔使擔心，仲話依家跟進緊監獄內食物質素欠佳、囚倉侷促、通風不足等問題。

講到獄中生活，佢話喺今個月初上咗三日食物衞生經理證書課程，課程內容包括食物衞生、細菌形成同個案研究等等。佢話呢次係入獄幾個月以嚟首次接觸到滑鼠同電子屏幕，而佢就選擇坐喺課室最後嘅位，令佢想起喺香港浸會大學教書嘅情景，諗起一班社工系嘅學生添！

話佢嘅辦事處會如常運作

雖然人在獄中，但佢話臻辦繼續「不缺席」、「不鬆懈」，如常運作。其實，佢入獄後諗盡方法刷存在感，但多次申請出外出席立法會嘅會議都被拒絕，惟有透過臻辦去發放消息。