政情：羅冠聰出走美國 進修不忘唱衰香港
反修例風波搞到滿城風雨，原來被取消立法會議員資格（DQ）、依家係香港眾志常委嘅羅冠聰靜雞雞出走美國。香港飛美國嘅機程大約十五個鐘，最長都要十七個鐘，示威者近日癱瘓機場，好多旅客被迫滯留，究竟羅冠聰用乜嘢方法可以突破重圍上到機呢？抑或佢早喺癱瘓機場之前已飛走呢？
羅冠聰早喺今年三月就講過，暑假會入讀美國耶魯大學東亞研究系，修讀一年嘅碩士課程，課程聚焦中國研究，但冇披露過幾時會起行，而佢尋日喺Facebook貼文話已經抵達紐約，準備去耶魯大學進修。
佢仲話喺呢個動盪時代出走，唔單止感到惆悵，亦有一股強烈嘅責任感，因為佢過去一直參與國際連結工作，眾志亦喺多年前便展開推動「香港人權及民主法案」嘅立法游說，而喺美國呢一年，繼上次同國務卿、國會議長會面，推動香港議題嘅敏感度，佢相信將會有非常多工作展開。
實行香港美國大合奏
過往羅冠聰亦曾多次外訪唱衰香港，以佢嘅講法，喺美國呢一年都會繼續做呢啲工作，實行香港美國大合奏喇！