政情：社會大撕裂冇局長落台 白鴿黨搵羅致光祭旗促帶頭辭職

其實示威者一直都有要求問責官員下台，如果要數同今次修例風波相關嘅官員，就包括特首、律政司司長同保安局局長，即使計埋後期愈演愈烈嘅警民衝突，最多都係數埋警務處處長，點數都數唔到勞福局，甚至連白鴿黨封公開信都係將矛頭指向特首同警隊為主，但走去叫羅致光辭職，睇落就完全唔關事喎。

曾任白鴿黨副主席

白鴿黨封公開信話該黨超過六十名黨員聯署，當中不乏該黨核心人物，包括該黨前主席劉慧卿、立法會議員林卓廷、許智峯等，要求羅致光帶頭辭職，目的就係為當前局勢寫下休止符。該黨提出原因係羅致光喺九○年加入該黨前身香港民主同盟，亦都喺九四年成為白鴿黨創黨黨員之一，做過立法會議員同該黨副主席，過往對白鴿黨同民主運動都有貢獻，只不過喺一七年要加入政府先至退黨，都係泛民主派嘅一員，所以該黨今次就以叫羅重拾當年追逐公義同民主嘅初衷之名，叫佢退出政府。勞福局發言人回應查詢時話局長知悉有關信件，不會公開評論。

投身熱廚房「被退黨」

老實講，就算羅致光肯辭職，都未必會牽動到其他問責官員，今次白鴿黨突然發信針對佢，都唔知係咪因為其他相關嘅官員一直唔肯落台，就改為搵羅呢個前黨友「祭旗」，睇吓會唔會有機會突破。不過翻查資料，其實當時羅致光喺決定出任局長時，一度表明唔想退黨，只係當時黨內主流意見認為佢要退，佢先至退，點知白鴿黨趕完人走，又要人聽佢支笛？

睇番一七年，羅當時形容係「被退黨」，換言之，當年係白鴿黨逼走羅致光，殊不知事隔兩年仲要求羅辭職。如果白鴿黨當初冇趕羅走，羅仲係白鴿黨黨員，咁白鴿黨今次叫佢辭職都仲有啲牙力，如今羅已退黨，亦唔係是次修例風波嘅相關官員，白鴿黨都仲要求佢辭職，點睇都有啲牽強，睇嚟白鴿黨係搵唔到突破缺口，所以搵個較親近嘅人嚟開刀。