中環出更：轟做唔到政治工作 陳健波倡廢政助
局長政治助理（政助）一向被外界批評職能唔清晰，甚至連聯絡工作都做得唔好。立法會保險界議員陳健波（波哥）尋日同建制派「六人組」其他成員一齊發表對施政報告嘅建議，佢喺建議書中直指政助處理唔到政治工作，建議要將職位提升為更高級別嘅政治顧問。似乎繼其他議員發炮後，佢都對政助有好大意見喎。
波哥話，近日嘅風波反映政府未能掌握民意方向，建議成立一個機制研究及評估民意方向。佢又話，設立政助原意係想協助局長處理政治工作，但依家定位不清，職位較低，人選又缺乏政治或公共事務經驗，根本處理唔到政治工作，如果淨係做聯絡工作，咁就浪費咗，不如畀多少少錢請啲叻啲嘅人做政治顧問，專責統籌政治相關嘅工作，包括議會游說、政治分析、民意評估等咁話。
謝偉銓叫政府善用社交媒體
至於同屬「六人組」嘅建築、測量、都市規劃及園境界議員謝偉銓就建議政府加強同社會各界嘅聯繫溝通，迅速、有效收集民意，解釋政策，澄清誤解，善用網絡傳播及社交媒體，提升民政專員收集民意嘅職能，局長同副局長多啲落區等。依家社會撕裂嚴重，如政府再唔聽意見，繼續「堅離地」，真係冇眼睇喇。
卓妮