中環出更：氣候暖化嚴峻 李銳波為母校裝太陽能板
回饋母校嘅途徑有好多種，例如最常見嘅成立獎學金，為母校增添可再生能源設施，都係一個唔錯嘅方法。電力工程專家李銳波博士，有鑑於氣候暖化日趨嚴峻，節能減碳實在刻不容緩，發現學校校舍嘅耗電量都好大，於是斥資為母校安裝太陽能板，既慳電又可以向師弟妹灌輸再生能源嘅知識。
今年五月喺中電董事局退休嘅李銳波，舊年年尾就萌生構思，打算喺母校何明華會督銀禧中學嘅天台安裝太陽能板，而相關工程喺七月中展開，一百四十四塊太陽能板喺上周四全數完成安裝，並喺尋日舉行併網發電儀式，而學校可將天台太陽能發電板嘅電力售予電力公司，並將所得嘅金錢撥到獎學金，或投放喺清貧學生嘅教育需要上。
身兼校董嘅李銳波話儘管學校舊翼天台逾半面積鋪咗太陽能板，但所產生嘅電力都只能夠抵銷日常用電量嘅兩成左右，反映學校嘅耗電偏高，因此有必要做好能源稽核嘅工作，促使太陽能發電嘅對沖比率能有所提升。
雖然母校成為咗目前全港最大規模嘅學校太陽能發電項目，但係李銳波認為大家都致力邁向低碳未來，邊個規模第一都無咩所謂；校長王莉莉就話期望善用太陽能系統，向學生灌輸再生能源嘅知識，實踐可持續發展嘅理念同價值。
謝展寰少開冷氣 唔用就閂機
李寶椿聯合世界書院校董會主席湯啟康、聖公會中學校長會主席陳婉玲同環境局副局長謝展寰都有出席儀式。講起低碳生活，謝展寰自問學唔到佢上司黃錦星慳電嘅成績，又話自己嘅慳電方法，不外乎係轉用慳電照明，盡量少開冷氣，同養成唔用就熄燈或關機嘅習慣。佢又話設法延緩氣候變暖，係關乎人類生死存亡嘅一項挑戰，所以佢希望大家集思廣益，研究進一步嘅減碳方法。
卓妮