政情：張國鈞議辦被毀都唔整 想畀街坊睇示威罪證
身兼中西區區議員嘅立法會議員張國鈞（Horace）喺西環山市街嘅議員辦事處，前晚受到示威者嚴重破壞，中西區區議會副主席陳學鋒尋日就引述Horace話，議辦有兩塊玻璃爛咗，依家唔諗住整番好佢，會維持原狀一段時間，目的係想畀人知道原來遊行示威會帶嚟幾咁野蠻嘅威力，亦作為示威者嘅罪證。
話摧毀唔到佢嘅意志
Horace亦喺社交網站貼文話收到唔少市民關心同慰問，又話因為港島區好多個地方仍然暴亂未息，因此再三叮囑大家要注意人身安全。佢亦都話呢個議辦係為西環區居民提供地區服務嘅，仲話嚴厲譴責破壞辦事處嘅人，仲話摧毀唔到佢服務市民嘅意志。由於佢冇咗個辦事處，所以話會向其他團體借場，以便繼續為街坊服務咁話喎。