政情：保留內地廠房 林智彬：一動不如一靜
香港廠商近年逐步將內地廠房遷移往東南亞各地。經營玩具生產嘅中華總商會青年委員會主席林智彬話論工人技術，越南對比內地仲有段距離，但由於工資低廉同玩具生產相關嘅五金同電子部件等供應鏈日趨完善，加上越南製作嘅玩具，又可免除美國關稅嘅顧慮，所以有好多出口玩具至美國嘅行家，早已經將生產基地移往越南。
因為客戶以日本為主
但佢就一動不如一靜，繼續保留內地嘅廠房，原因係佢嘅客戶係以日本為主，而美日兩地對玩具嘅要求好唔同，譬如美國比較着眼於大批嘅貨量同低廉嘅價格；日本就好注重精細嘅品質，相較之下生產價格就可以調整。為咗要達到日本客戶嘅嚴格要求，因此佢要維持內地嘅生產。
其實佢早前去過越南考察，發現當地政府都好鼓勵年輕人投身創科，亦到訪越南一個位於動物園旁邊嘅創業基地，不時有鴕鳥同長頸鹿喺會議室附近出現，自然獨特嘅景象令佢印象深刻。