中環出更：香港立立亂 林鄭變「民族罪人」
香港近兩個月因為港府提出修訂《逃犯條例》而風波不斷，遊行、示威變成暴力衝擊，真係區區都立立亂，港府已經變成一個壞咗嘅政府。早喺○二年，時任國家總理朱鎔基就曾經話過︰「香港回歸祖國在我們手裏搞壞了，我們豈不成了民族罪人？」似乎特首林鄭月娥依家真係變咗「民族罪人」喇！
朱鎔基喺○二年十一月來港時，曾經喺禮賓府發表講話。佢當時就話總係以有香港而自豪，唔相信香港搞唔好，如果香港搞唔好，「不但你們有責任，我們也有責任」，又話︰「香港回歸祖國在我們手裏搞壞了，我們豈不成了民族罪人？」而佢當日仲以普通話唸出香港流行曲《獅子山下》嘅歌詞，認為歌詞令人感動，充滿真實感情。
兌現朱鎔基17年前一席話
奈何事隔近十七年，香港回歸二十二年之際，由現屆特首林鄭月娥牽頭嘅港府就因修例而一石激起千重浪，香港多區嘅遊行示威，更演變成連場衝突，經濟、民生大受影響，民怨載道，樣樣都搞唔好。估唔到十七年前嘅一席話，依家竟然兌現。
卓妮