中環出更：香港動畫少自創故事 彭子傑：要另覓出路
日本嘅動漫文化非常興盛，成為各地動畫業界嘅參考對象。香港數碼娛樂協會會長彭子傑認為日本動畫業嘅成功模式，本地業界好難完全倣效，尤其係自創嘅動畫故事較少，所以要另覓出路。
「第七屆動畫支援計劃」啟動典禮尋日舉行，唔單止彭子傑，而「創意香港」助理總監袁賽芳同香港動畫業及文化協會秘書長盧子英都有出席。講開日本動畫，彭子傑以早前發生火災嘅京都動畫為例，指呢間公司原初係以互助社嘅形式，畀日本嘅家庭主婦承接外發嘅動畫上色工序，從而賺取外快，由於處理手法非常認真同堅持高質素，炮製嘅動畫人物表情同動作都特別出色。
葉偉青：要面向國際才可收回成本
彭子傑又話日本動畫市場競爭激烈，加上動畫影碟近年銷路日走下坡，導致利潤微薄，惟有靠低工資同高工作量嚟令動畫業持續，反觀香港亦係高生活成本嘅地方，要重複當年京都動畫嘅發迹故事殊非容易。佢話香港都有唔少動畫人才，但多數係承接廣告工作為主，鮮有自己創作嘅動畫故事，亦無法籍原創動畫來發展品牌，若能夠給予適當支援，相信可造就業界發揮嘅機會，從而嘗試喺電影媒介開闢另一條發展道路。
動畫導演兼漫畫家葉偉青話市作一齣動畫不外乎係創作一個獨立嘅新題材，或依大眾歡迎嘅漫畫故事來改編，由於所需資金非常龐大，所以動畫製作選材一般以後者居多。而鑑於香港市場細小，本土動畫必須面向國際，才有收回成本嘅機會。
城市大學創意媒體學院高級特任講師梁曉明就認為本地動畫業，論技術頗為到家，但要令世人留下印象，仲需要構思有本土元素嘅原創故事方面下一番工夫。佢話荷里活製作嘅動畫系列，能夠廿幾年來一集又一集都票房爆滿，除市場推廣外，感動人心嘅故事內容，同性格鮮明嘅角色塑造都功不可沒。
卓妮