政情：泛民區議員搶鏡新招 逢開會戴頭盔
修訂《逃犯條例》風波仍未完結，多個區議會都先後討論緊近期嘅衝突事件，有啲區議會傾完又傾，沒完沒了。元朗區議會尋日亦有多名民主派區議員開記者會，批評區議會唔開特別會議討論上月元朗白衣人襲擊他人事件，其中區議員杜嘉倫多次重複元朗居民好擔心自身安全，希望警方喺會議上交代，仲帶咗頂白色頭盔嚟，話以後區議會開會都會戴住佢，以示抗議咁話。
冀政府交代元朗打人事件
杜嘉倫尋日一嚟到現場已經準備充足，手拎住一個白色頭盔，之後答記者問題時，仲即刻將頭盔戴上頭，睇真啲，頭盔寫有「安全？？」字眼，唔知係咪驚講講吓畀人扑頭，又或者係順便抗議白衣人暴力事件。
問番先知，原來佢同另一區議員黃偉賢當晚到場視察，被三名白衣人圍住揚言要打佢哋，好彩最後無事。佢話，元朗居民至今都仲驚緊會被人襲擊，覺得元朗好危險，自己應承咗一名市民，以後開區議會都會戴住頭盔抗議，希望政府盡快交代事件，畀個安心居民。不過講開又講，當日白衣人唔止扑頭咁簡單，唔知佢仲有冇法寶護住身體其他部位呢？