政情：驗眼名額難撲過演唱會飛 區議員爭崩頭

話說南區區議會嘅一個社區重點項目係同香港大學眼科學系合作，搞咗個眼科檢查服務，為五十歲或以上嘅南區居民提供眼科檢查。計劃今年五月開始推行，喺每個月嘅第二個星期五早上九點，可以透過網上同電話，預約未來三日至四十五日嘅檢查名額。不過每個時段只有兩個檢查名額，同埋兩個候補名額，上個月每日大概有十六至十八個名額，今個月就希望每日有十八至二十個。原來每日名額得咁少，難怪要撲啦。

張錫容就透露，自己上個月幫屋企人預約，未夠九點就已經開定電腦，搭正九點上網預約，但係都唔夠其他人快。佢建議有關方面增加人手處理預約，亦可以增加名額。不過佢又話，啲人可能都係羊群心理，好似之前南港島線開幕咁，相信過一排應該會好啲。睇嚟佢即使預約失敗，但都幾樂觀喎。

有人候補成功或電話約到

至於林玉珍就話，六月幫居民上網預約後，自己又試吓約，雖然只係預約到候補名額，不過都成功收到電話，候補成功，可以喺上個月做到檢查，仲大讚做檢查嘅地方方便，設備又完善，好過自己兩年前喺其他地方做嘅檢查添。

另一個成功例子就係歐立成喇，不過佢就唔係好似另外兩位咁用網上預約，而係選擇喺十點幾十一點左右，打電話去預約，仲成功預約到八個咁多添。佢話，其實都係睇吓好唔好彩，自己打通完電話，預約完一個就收線，然後就即刻再打電話。唔通打電話反而易約啲？

眼見連區議員都爭崩頭，港大李嘉誠醫學院眼科學系助理臨床教授郭思瑋回應時就話，大家對計劃嘅反應實在太踴躍，一個月做到嘅人數有限，只能安慰市民喺五年內繼續報名，仲話「只要有恒心，鐵杵磨成針」，叫啲市民只要有恒心，都應該預約到嘅，嚟緊會增加人手喎。

講真嗰句，今日唔知聽日事，雖然反應咁熱烈，但似乎真係聽吓意見，盡快增加人手改善預約服務，咁唔使連班區議員都要爭崩頭啦。